為利也為名

本來想以標題 Gobal-China-zation 寫一篇關於 Stephon Marbury（內地譯斯蒂芬．馬布里）入 CBA 搵食嘅文章，但係馬大爺借打波宣傳自己品牌 Starbury 係人都諗到，咁我再寫都係好無謂。於是，當我繼續留意佢喺內地嘅情況之後，我決定用另一個切入點去為我呢位曾經鍾意過嘅 Point Guard 寫啲嘢。

作為外援嚟 CBA 搵食，通常都係喺 NBA 沉到板凳尾嘅球員，而想喺感覺上比歐洲次一級嘅中國發威，希望能夠成為球隊主力然後以美好回憶終結自己球員生涯。馬布里可能都有近似想法，但佢同人唔同嘅係佢曾經入過All-Stars，係明星，而且有自己個品牌，係老闆。所以話佢嚟中國唔係為賣自己個品牌都無人信，不過我覺得除咗錢，佢可能會好醒目咁諗到佢所做嘅係一件偉大嘅事。

一個偉大球員，除咗好波，又能夠為球隊贏波，攞冠軍之餘，最重要係喺籃球界以至運動界帶來正面影響。

馬布里喺 NBA 場內場外表現有好有壞，不過以後期 Knicks 嘅負面新聞較為深刻。雖然上年季尾能夠加入 Celtics 幫手打季後賽，但去到今季唔肯以最低工資續約，無人願意收留嘅境地，估唔到佢會想到中國嘅 CBA。如果細心諗，呢度除咗可以帶來新嘅客源之外，仲係一個翻身嘅舞台。其一係中國球迷唔會理佢之前有幾多負面嘢，佢哋淨係想睇呢粒星嚟中國點樣大幹一番；其二係球隊無負擔，一來本身球隊成績唔好，再差都無所謂，只要吸引到人入場就賺咗，二來因為簽外援有薪酬限制，馬大爺再攪事嘅話，頂多炒佢，賠返人工都係濕濕碎，更何況佢喺中國可以惡得乜嘢出樣？處喺呢種似乎只係講金嘅情況下，壓力就只係馬布里自己想走幾遠喇。而我嘅分析係，佢想做 CBA 史上第一人，為整個 CBA 帶來前所未有嘅轉變。

依目前國內嘅「獨狼熱*」情形嚟睇，馬布里除咗風頭一時無兩，最重要係樹立咗非常正面嘅形象——協助球隊勝利為目標嘅精神與及親切嘅態度。或者喺 NBA 佢都係一樣，但相隔一個太平洋，佢嘅好可以被放大一百倍。當繼續為山西汾酒這隊弱旅取得佳績，打進季後賽，甚至兩年內摘冠的話，我估佢喺國內可以被棒為神，創造一個傳奇。而傳奇必包括以下兩點，一係開創 NBA 老球星嚟 CBA 過第二春嘅先河，二係無論對球隊抑或整個聯盟都提高咗質素。仲有可能嘅係，當佢退休之後，會被邀請成為教練或者顧問，甚至負責修改賽制及球例，影響深遠。有一個好好嘅借鏡，就係日本 J-League 嘅薛高（Zico），佢為日本足球界帶來嘅影響足以令全國球迷敬佩。

當然，佢加入 CBA 只係一個月嘅時間，我嘅猜測就好似妄想，但我相信撇除金錢利益以外，馬布里始終想為自己嘅籃球生涯畫上完美嘅句號。至少佢依家已挽回不少名氣及聲譽，而且以佢目前嘅表現嚟睇，自譽為「CBA 第一控衛」亦當之無愧。

*註：馬布里國內綽號為獨狼。

馬布里各場成績

31/1   101：102   主場負   東莞新世紀       15 分     8 助攻     4 籃板   4 偷球
3/2     104：113   主場負   廣東宏遠          15 分   15 助攻     4 籃板   3 偷球
5/2     103：108   作客負   浙江廣夏          39 分     9 助攻     9 籃板   1 偷球
7/2       98：87     作客勝   浙江稠州          34 分     7 助攻     6 籃板   3 偷球
10/2   116：107   主場勝   北京首鋼          30 分   15 助攻     9 籃板   2 偷球
18/2   108：101   主場勝   天津榮鋼          12 分   11 助攻     4 籃板   1 偷球
21/2   119：98     作客勝   陝西鋰源動力   13 分   10 助攻     5 籃板
24/2     90：109   作客負   新彊廣滙          12 分     2 助攻     2 籃板   1 偷球
26/2   104：98     主場勝   遼寧盼盼          26 分   13 助攻   12 籃板   7 偷球

五勝四負   平均   21.8 分   10 助攻   6.1 籃板   2.4 偷球

Lakers殺手

經過１１月主場大炒 Lakers 後，今日 Nuggets 又憑近七成嘅三分 （２２投１５中）射死上年喺西岸季後賽最後一道門。

雖然隔咗兩個月，好多情況唔同咗，但係我認為 Nuggets 始終求勝心係強過 Lakers，尤其 Melo 缺陣， Big Shot Billups 又係本身有傷患，而 Lakers 繼續搵手又傷腳又傷嘅 Kobe 撐場，都要輸１３分，都係證明咗 Nuggets 所有球員都有決心報仇。

 另外要提吓兩個球員，Lawson 及 Birdman ，Lawson 因為係新人，所以同 Lakers 本身無乜新仇舊恨，只不過佢無緣參加今屆 Rookie Challenge，相信都有少少鬱氣，最有效就梗係有得出場嘅時候就搶表現啦，結果佢以最耍家嘅速度狂飆，對 Lakers 造成唔少傷害，亦分擔咗 Billups 些少做 PG 策畫嘅時間。至於 Birdman 除咗攞１５個籃板威水之外，嚇親我嘅係佢無 Gel 頭，我唔知佢一季有幾多場無 Gel，但係今場唔 Gel 我覺得佢係有心唔同，再即管睇吓聽日對 Jazz Gel 唔 Gel，如果唔 Gel 都幾好睇頭，因為髮型同 AK47 一樣，到時就傻傻分不清了，嘻嘻~

Nuggets 能否成為今季 Lakers 殺手，仲有兩場打過先知道，不過我個人認為以３﹣１完結多，而情況是本月尾 Lakers 主場贏，四月頭 Nuggets 主場贏，拭目以待。

上面兩張圖係季前畫嘅，所以無諗到 Afflalo （無畫到）有不俗表現，而 Balkman 就好似蒸發咗。

綠軍考驗！

又係第四節，似乎 Celtics 真係差咗啲韌力，或者係一份火氣。以我睇波經驗，Celtics 現時係處於一種調節期，屬季中常有嘅考驗，不過可以話對於 Celtics 嚟講，出現時間唔差。

大家應該知道，應付常規賽其實好高深，贏唔好贏盡，輸亦都唔好輸得太醜。始終８２場比賽講緊嘅係耐力，當中首先有開季調整，然後大部分球隊都有些少傷患問題需要克服再調整，季中到明星週末小休一下，就來到熱烘烘的球員交易期限，來一些策略性補助，或是換星行動，直到最後兩個月，先係整季嘅重頭戲，因為真正有冠軍相嘅，呢個時候就係最關鍵嘅心理調節。而我想講嘅，就係點樣將季中嘅低潮帶到季尾嘅高潮。

以 Celtics 現時連輸三場，仲要輸俾仇家 Magic、Hawks 同 Lakers 嘅情形嚟睇，係就係羞家啲，不過對於一隊穩陣入季後賽嘅球隊嚟講，雖然係輸，但只要唔係太一面倒，同埋唔係暴露咗弱點，實際上傷害唔係太大。尤其呢種情況出現喺球員交易期限前，如果 GM 及教練精明，應該可以透過交易作出強化，而更大機會係唔需要交易卻透過新戰術及訓練去彌補之前嘅不足，只要及時對症下藥，Celtics 唔使怕呢一陣子被擊潰。

而且 Celtics 嘅球員都非善男信女，鍾意打逆境波，睇呢幾場就知佢哋順得滯，帶唔到落第四節，變咗俾人哋搶咗個逆𨍭角色。所以若以呢個邏輯放大到一季上，中段受挫折反為對 Celtics 有利，因為咁先有動力去追，再殺到季尾。而睇睇 schedule，球員交易期限日同 Lakers 再碰頭係一個唔錯嘅日子去試驗成果。

而只要過咗呢個考驗，最關鍵就係對 Cavaliers 剩落嘅三場比賽喇。

其實對於 Celtics 嚟講，真正最關鍵嘅一場係４月４日主場對 Cavaliers，因為嗰場先係真正左右到入季後賽時嘅士氣。

而作為 Rondo 嘅擁躉，我希望發生嘅係，２月尾主場贏，３月中作客輸，最後４月頭贏埋就最好！

狂徒日記

從今日起，我將會以「狂徒」身份喺呢個 Blog 暢所欲言。

先聲明，我唔會以客觀分析嘅態度去寫同畫，喺呢道，係絕對主觀嘅。

開頭我會以ＮＢＡ為主，之後亦都希望加返啲關於香港籃球嘅。

而為咗保留吹水嘅感覺，會以廣東話口語演繹，請唔好要求書面語。

大家有興趣就一齊發表睇法啦！